لندن( سپورٹس ڈیسک) انگلینڈ کے اسٹار بلے باز جو روٹ نے انکشاف کیا ہے کہ انہوں نے ساتھی کھلاڑی گس اٹکنسن کو ہدایت دی تھی کہ وہ میچ جیتنے پر توجہ دیں اور ان کے 99 رنز پر ناٹ آؤٹ رہ جانے کی فکر نہ کریں۔یہ واقعہ بھارت کے خلاف دوسرے ایک روزہ میچ میں پیش آیا، جہاں انگلینڈ نے چار وکٹوں سے کامیابی حاصل کرتے ہوئے تین میچوں پر مشتمل سیریز ایک ایک سے برابر کر دی۔بھارت کی جانب سے دیے گئے 234 رنز کے ہدف کے تعاقب میں انگلینڈ کا آغاز اچھا نہ تھا، کیونکہ جسپریت بمراہ نے پہلی ہی گیند پر بین ڈکٹ کو آؤٹ کر دیا۔ اس کے بعد جیکب بیتھل اور کپتان ہیری بروک بھی نمایاں کارکردگی دکھانے میں ناکام رہے۔مشکل صورتحال میں جو روٹ نے ذمہ دارانہ بیٹنگ کا مظاہرہ کرتے ہوئے اننگز کو سنبھالا اور ناقابل شکست 99 رنز بنا کر ٹیم کی کامیابی میں اہم کردار ادا کیا۔جو روٹ نے بتایا کہ اختتامی لمحات میں انہوں نے گس اٹکنسن کو کہا کہ وہ صرف ٹیم کو فتح دلانے پر توجہ مرکوز رکھیں، ان کے ذاتی اسکور یا سنچری مکمل نہ ہونے کی فکر نہ کریں۔ ان کے مطابق ٹیم کی جیت ہمیشہ انفرادی کامیابی سے زیادہ اہم ہوتی ہے۔
