مالدیپ کا پاکستان کو فٹبال ٹورنامنٹ میں شرکت کی دعوت، خطے کی ٹیموں کی شمولیت متوقع

مالدیپ( سپورٹس ڈیسک)مالدیپ کی فٹبال تنظیم نے پاکستان کو جون میں منعقد ہونے والے فٹبال ٹورنامنٹ میں شرکت کے لیے باضابطہ دعوت دے دی ہے۔ ذرائع کے مطابق پاکستان فٹبال فیڈریشن اور مالدیپ کی فٹبال تنظیم کے درمیان اس سلسلے میں مشاورت جاری ہے اور جلد کسی حتمی فیصلے کا امکان ظاہر کیا جا رہا ہے۔ذرائع کا کہنا ہے کہ اس ٹورنامنٹ میں مزید دو ٹیموں کی شرکت بھی متوقع ہے جن کا تعلق جنوبی ایشیا کے ممالک سے ہوگا۔ اطلاعات کے مطابق مالدیپ کی جانب سے بنگلہ دیش اور نیپال کی فٹبال تنظیموں سے بھی رابطے کیے گئے ہیں تاکہ ایونٹ کو مزید مؤثر اور دلچسپ بنایا جا سکے۔ماہرین کے مطابق ایسے مقابلے نہ صرف خطے میں فٹبال کے فروغ کا باعث بنتے ہیں بلکہ ٹیموں کے درمیان باہمی تجربے اور مسابقت کو بھی بڑھاتے ہیں۔