یہ تاثر درست نہیں کہ آئندہ ورلڈ کپ صرف تیز اور باؤنسی وکٹوں پر کھیلا جائے گا:مائیک ہیسن کا مؤقف

لاہور ( سپورٹس ڈیسک) پاکستان کرکٹ ٹیم کے وائٹ بال ہیڈ کوچ مائیک ہیسن نے آسٹریلیا کے خلاف ہوم سیریز میں اسپن کے لیے سازگار وکٹوں کے استعمال پر ہونے والی تنقید کو مسترد کر دیا ہے۔مائیک ہیسن نے کہا کہ یہ تاثر درست نہیں کہ آئندہ ورلڈ کپ صرف تیز اور باؤنسی وکٹوں پر کھیلا جائے گا، اس لیے اسپن کے لیے سازگار وکٹوں پر کھیلنا غلط تیاری نہیں ہے۔انہوں نے کہا کہ بعض کرکٹ ماہرین کی جانب سے یہ مؤقف سامنے آیا تھا کہ جنوبی افریقا میں ہونے والے ورلڈ کپ کی تیاری کے لیے پاکستان کو صرف فاسٹ اور باؤنسی وکٹوں پر میچز کھیلنے چاہئیں، تاہم یہ سوچ حقیقت پر مبنی نہیں۔ہیڈ کوچ کے مطابق جنوبی افریقا کی تمام وکٹیں یکساں تیز اور باؤنسی نہیں ہیں، اس لیے مختلف کنڈیشنز کے مطابق تیاری کرنا ضروری ہے۔انہوں نے مزید کہا کہ 2027 کا ورلڈ کپ صرف جنوبی افریقا میں نہیں بلکہ زمبابوے اور نمیبیا میں بھی کھیلا جائے گا، جہاں اسپن بولنگ اہم کردار ادا کرتی ہے، لہٰذا پاکستان ٹیم کو ہر طرح کی کنڈیشنز کے لیے تیار ہونا ہوگا۔مائیک ہیسن نے زور دیا کہ مختلف پچز پر کھیلنے کی حکمت عملی ٹیم کو عالمی سطح پر بہتر کارکردگی کے لیے تیار کرے گی۔