ماڈل ہما سلیم کا نامعلوم کرکٹر پر ہراسانی کا الزام، قانونی کارروائی کا اعلان

 لاہور( شوبز ڈیسک)پاکستانی ماڈل ہما سلیم نے سوشل میڈیا پر ایک نامعلوم کرکٹر کے خلاف ہراسانی، دھمکیوں اور ذہنی دباؤ کے سنگین الزامات عائد کرتے ہوئے قانونی کارروائی کا عندیہ دیا ہے۔ہما سلیم نے انسٹاگرام اسٹوری میں دعویٰ کیا کہ وہ گزشتہ کچھ عرصے سے مسلسل ہراسانی اور دباؤ کا سامنا کر رہی ہیں۔ ان کے مطابق وہ گزشتہ دو ماہ سے متعلقہ شخص سے کسی قسم کے رابطے میں نہیں ہیں، تاہم اس کے باوجود انہیں اور ان کے قریبی افراد کو مبینہ طور پر ہراساں کیا جا رہا ہے۔ماڈل کا کہنا تھا کہ ان کی پیشہ ورانہ ساکھ کو بھی نقصان پہنچانے کی کوشش کی جا رہی ہے۔ انہوں نے کہا کہ مناسب وقت پر اپنی قانونی ٹیم کے ذریعے تمام حقائق اور شواہد عوام کے سامنے پیش کریں گی۔واضح رہے کہ ہما سلیم نے اپنی پوسٹ میں کسی کرکٹر کا نام ظاہر نہیں کیا، جبکہ خبر سامنے آنے تک ان الزامات پر کسی کرکٹر یا ان کے نمائندے کی جانب سے کوئی باضابطہ ردعمل سامنے نہیں آیا۔