دبئی( سپورٹس ڈیسک) پاکستان کے آل راؤنڈر محمد نواز کو انٹرنیشنل کرکٹ کونسل (آئی سی سی) کے اینٹی ڈوپنگ قوانین کی خلاف ورزی پر نااہلی کا سامنا کرنا پڑا ہے۔آئی سی سی کے مطابق 32 سالہ محمد نواز کا ڈوپ ٹیسٹ 7 فروری 2026 کو سری لنکا کے شہر کولمبو میں نیدرلینڈز کے خلاف ٹی ٹوئنٹی ورلڈکپ میچ کے بعد لیا گیا تھا، جس کے نمونے میں ممنوعہ مادہ کاربوکسی-ٹی ایچ سی کی موجودگی سامنے آئی۔بیان کے مطابق محمد نواز نے ضابطے کی خلاف ورزی تسلیم کرتے ہوئے مؤقف اختیار کیا کہ یہ مادہ کھیل کے دوران کارکردگی بہتر بنانے کے مقصد سے استعمال نہیں کیا گیا تھا بلکہ اس کے استعمال کی وجہ مختلف تھی۔آئی سی سی نے وضاحت اور حالات کو مدنظر رکھتے ہوئے محمد نواز پر تین ماہ کی نااہلی عائد کی، جس کا اطلاق یکم مئی 2026 سے کیا گیا، جب انہوں نے رضاکارانہ طور پر عارضی معطلی قبول کی تھی۔کرکٹ کی عالمی تنظیم کے مطابق اگر محمد نواز منشیات سے متعلق علاج کے مقررہ پروگرام کو کامیابی سے مکمل کر لیتے ہیں تو ان کی سزا کم ہو کر ایک ماہ رہ جائے گی۔آئی سی سی نے مزید کہا کہ محمد نواز پہلے ہی ڈھائی ماہ کی پابندی مکمل کر چکے ہیں، اس لیے پروگرام کامیابی سے مکمل ہونے کی صورت میں انہیں مزید کسی معطلی کا سامنا نہیں کرنا پڑے گا۔
