لاہور( پاکستان خبر) مون سون بارشوں کے باعث پنجاب کے دریاؤں میں پانی کے بہاؤ میں مسلسل اضافہ ریکارڈ کیا جا رہا ہے، جس کے نتیجے میں مختلف مقامات پر سیلابی صورتحال پیدا ہو گئی ہے۔صوبائی ڈیزاسٹر مینجمنٹ اتھارٹی (پی ڈی ایم اے) پنجاب کے مطابق دریائے سندھ میں تربیلا اور چشمہ کے مقامات پر نچلے درجے کا سیلاب ہے۔ تربیلا کے مقام پر پانی کا بہاؤ 3 لاکھ 36 ہزار کیوسک جبکہ چشمہ کے مقام پر 3 لاکھ 2 ہزار کیوسک ریکارڈ کیا گیا ہے۔دریائے چناب میں بھی مرالہ اور قادرآباد کے مقامات پر نچلے درجے کی سیلابی صورتحال موجود ہے۔ مرالہ کے مقام پر پانی کا بہاؤ 1 لاکھ 95 ہزار کیوسک، خانکی کے مقام پر 2 لاکھ 62 ہزار کیوسک جبکہ قادرآباد کے مقام پر 2 لاکھ 45 ہزار کیوسک ریکارڈ کیا گیا ہے۔پی ڈی ایم اے کے مطابق دریائے ستلج اور دریائے جہلم میں پانی کا بہاؤ معمول کے مطابق ہے، جبکہ دریائے راوی میں بلوکی کے مقام پر پانی کی سطح 73 ہزار کیوسک تک پہنچ گئی ہے۔دریائے راوی میں جسڑ، شاہدرہ اور ہیڈ سدھنائی کے مقامات پر پانی کا بہاؤ معمول کے مطابق ہے۔ نارروال کے نالہ بسنتر میں درمیانے درجے کے سیلاب کی صورتحال ہے، جبکہ گجرات کے نالہ بھمبر اور وزیرآباد کے نالہ پلکھو میں نچلے درجے کا سیلاب ریکارڈ کیا گیا ہے۔ڈائریکٹر جنرل پی ڈی ایم اے کے مطابق بالائی علاقوں میں ہونے والی بارشوں کے باعث دریاؤں میں پانی کے بہاؤ میں اضافہ ہوا ہے۔
