کراچی (شوبز ڈیسک) پاکستان کی معروف ٹی وی میزبان ندا یاسر اپنے ایک حالیہ بیان کے باعث سوشل میڈیا پر توجہ کا مرکز بن گئی ہیں، جس میں انہوں نے والدین کو بچوں کی تربیت اور خودمختاری سے متعلق مشورہ دیا۔اپنے مارننگ شو میں گفتگو کرتے ہوئے ندا یاسر نے کہا کہ والدین کو بچوں کے لیے صرف جائیداد اور زیورات جمع کرنے کے بجائے انہیں خود انحصاری، زندگی کے تجربات اور عملی تربیت کے مواقع فراہم کرنے چاہییں۔انہوں نے کہا کہ بچوں کی ضرورت سے زیادہ حفاظت اور ہر معاملے میں روک ٹوک ان کے اعتماد کو متاثر کر سکتی ہے۔ والدین کو چاہیے کہ وہ بچوں کو نئے تجربات حاصل کرنے، فیصلے خود کرنے اور ذمہ داری اٹھانے کی تربیت دیں تاکہ وہ مستقبل میں بہتر انداز میں اپنی زندگی گزار سکیں۔ندا یاسر نے مثال دیتے ہوئے کہا کہ بچوں میں اعتماد پیدا کرنے کے لیے انہیں اکیلے سفر جیسے تجربات سے بھی روشناس کرایا جا سکتا ہے، حتیٰ کہ کراچی سے لاہور تک تنہا سفر کرنے کی ہمت بھی دینی چاہیے۔تاہم ان کے اس بیان پر سوشل میڈیا صارفین کی جانب سے مختلف ردعمل سامنے آیا۔ کئی صارفین نے موجودہ حالات کا حوالہ دیتے ہوئے کہا کہ پاکستان میں امن و امان اور بچوں کے تحفظ سے متعلق مسائل کے باعث اس طرح کا مشورہ عملی طور پر مناسب نہیں۔بعض صارفین کا مؤقف تھا کہ بچوں کو خودمختار بنانا ضروری ہے، تاہم ان کی عمر، حالات اور حفاظتی تقاضوں کو مدنظر رکھنا بھی والدین کی ذمہ داری ہے۔
