مومنہ اقبال کے نکاح کی تصاویر وائرل، دلکش عروسی انداز نے مداحوں کو متاثر کر دیا

لاہور ( شوبز ڈیسک) پاکستانی شوبز انڈسٹری کی معروف اداکارہ مومنہ اقبال کی شادی کی تقریبات سوشل میڈیا پر توجہ کا مرکز بنی ہوئی ہیں، جبکہ ان کے نکاح کی تصاویر نے آن لائن پلیٹ فارمز پر دھوم مچا دی ہے۔نکاح کی تقریب کے فوٹو شوٹ میں مومنہ اقبال روایتی دلہن کے روپ میں نہایت حسین نظر آئیں۔ انہوں نے ڈل گولڈن رنگ کا خوبصورت لہنگا زیب تن کیا جس پر نفیس اور بھاری کڑھائی کی گئی تھی۔ اس کے ساتھ ہم رنگ چولی اور دوپٹہ جبکہ اضافی رسٹ رنگ دوپٹے نے ان کے برائیڈل انداز کو مزید منفرد بنا دیا۔اداکارہ نے اپنے عروسی انداز کو مکمل کرنے کے لیے نازک جیولری کا انتخاب کیا، جس میں ناتھ، ٹیکا، جھومر، گولڈ چوکر، ہار اور سنہری کنگن شامل تھے، جنہوں نے ان کی شخصیت کو مزید دلکش بنا دیا۔دوسری جانب ان کے شوہر حمزہ حبیب سفید رنگ کی روایتی شیروانی اور سفید و سنہری کلہ میں ملبوس نظر آئے، جس نے جوڑے کے روایتی انداز کو خوبصورت توازن عطا کیا۔مومنہ اقبال پاکستانی ڈرامہ انڈسٹری کا ایک نمایاں نام ہیں اور ان کے انسٹاگرام پر لاکھوں فالوورز موجود ہیں۔ انہوں نے اپنے کیریئر میں متعدد کامیاب ڈراموں میں اداکاری کے جوہر دکھائے ہیں۔نکاح کی تصاویر سامنے آنے کے بعد مداحوں اور شوبز شخصیات کی جانب سے جوڑے کو مبارکباد اور نیک تمناؤں کا سلسلہ جاری ہے، جبکہ مومنہ اقبال کا عروسی انداز سوشل میڈیا پر ٹرینڈ کر رہا ہے۔