لاہور ( شو بز ڈیسک) اداکارہ نمرہ شاہد نے گلوکار فلک شبیر کے حالیہ بیان پر ردعمل دیتے ہوئے اپنے خیالات کا اظہار کیا ہے، جس کے بعد شوبز انڈسٹری میں ایک نئی بحث شروع ہو گئی ہے۔ایک انٹرویو میں نمرہ شاہد نے کہا کہ اگر فلک شبیر اور ان کی اہلیہ سارہ خان بیرونِ ملک رہ رہے ہیں تو وہ کس معاشرتی نظام کی بات کر رہے ہیں، کیونکہ وہاں مختلف طرزِ زندگی اور لباس عام طور پر دیکھا جاتا ہے۔اداکارہ نے کہا کہ بچے وہی ثقافت اور اقدار سیکھتے ہیں جو والدین انہیں سکھاتے ہیں، اور اگر خاندان پاکستان سے باہر مقیم ہے تو ملکی سماجی تبدیلیوں کا اثر براہِ راست کم ہو جاتا ہے۔نمرہ شاہد نے کہا کہ وہ سمجھتی ہیں کہ فلک شبیر کی بات مکمل طور پر غلط نہیں، تاہم اس کا اندازِ بیان درست نہیں تھا۔ ان کے مطابق پاکستان ایک اسلامی ملک ہے اور یہاں تمام کام اسلام کے اصولوں کے دائرے میں رہ کر ہونے چاہئیں۔انہوں نے مزید کہا کہ فلک شبیر کو اس معاملے پر زیادہ فکر مند ہونے کی ضرورت نہیں، کیونکہ ان کی اہلیہ سارہ خان ایک باصلاحیت اداکارہ ہیں جنہوں نے ڈراموں میں شاندار کردار ادا کیے اور فیشن کے میدان میں بھی نمایاں کام کیا ہے۔یاد رہے کہ فلک شبیر نے حال ہی میں وزیراعلیٰ پنجاب سے درخواست کی تھی کہ عوامی مقامات پر نامناسب لباس کے حوالے سے قانون سازی کی جائے، جس کے بعد مختلف شوبز شخصیات کی جانب سے ردعمل سامنے آ رہا ہے۔
