کابل( مانیٹرنگ ڈیسک) ہرات کی سڑکوں پر ہونے والے احتجاجی مظاہروں پر پابندیوں کے بعد صورتحال نے ایک نئی شکل اختیار کر لی ہے، جہاں یہ تحریک اب آن لائن احتجاجی مہم میں تبدیل ہو گئی ہے۔افغان جریدے “ہشت صبح” کے مطابق خواتین کے حقوق کے تحفظ کے لیے شہریوں کی جانب سے ایک منظم آن لائن مہم شروع کی گئی ہے۔ رپورٹ میں کہا گیا ہے کہ ہرات میں بعض خواتین کی گرفتاریوں کے واقعات کے بعد عوامی ردعمل میں اضافہ دیکھا گیا ہے۔مہم کے دوران ملک کے اندر اور بیرونِ ملک موجود متعدد افراد اس احتجاجی تحریک میں شامل ہوئے ہیں اور سوشل میڈیا پر اظہارِ یکجہتی کر رہے ہیں۔دوسری جانب بعض رپورٹس کے مطابق انسانی حقوق کے مختلف اداروں نے افغانستان میں خواتین کے ساتھ سلوک پر تشویش کا اظہار کیا ہے اور صورتحال پر نظر رکھنے کا مطالبہ کیا ہے۔ماہرین کے مطابق افغانستان میں جاری سماجی و سیاسی حالات کے باعث مختلف طبقوں میں ردعمل سامنے آ رہا ہے اور عوامی اظہار کے طریقے بھی تبدیل ہو رہے ہیں۔
