شمعون عباسی کی مبینہ جرائم پر مبنی ڈرامے کی مخالفت، ٹی وی مواد پر سوالات اٹھا دیے

کراچی ( شوبز ڈیسک)فلم ساز اور اداکار شمعون عباسی نے مبینہ منشیات فروش انمول عرف پنکی کی زندگی پر مبنی مجوزہ ڈراما سیریل کی مخالفت کرتے ہوئے کہا ہے کہ ایسی کہانیاں ٹیلی ویژن اسکرین کے لیے موزوں نہیں ہیں۔سوشل میڈیا پر اپنے بیان میں شمعون عباسی نے سوال اٹھایا کہ آخر معاشرے میں موجود مثبت، حوصلہ افزا اور کامیابی کی کہانیوں کے بجائے منفی کرداروں کو ڈرامائی انداز میں پیش کرنے کی ضرورت کیوں پیش آ رہی ہے۔انہوں نے کہا کہ خواتین کی جدوجہد اور کامیابی پر مبنی بے شمار ایسی کہانیاں موجود ہیں جنہیں ٹی وی پر دکھا کر معاشرے میں مثبت پیغام دیا جا سکتا ہے۔شمعون عباسی نے ان اطلاعات پر بھی تبصرہ کیا کہ اس منصوبے میں اداکارہ صبا قمر کو مرکزی کردار کے لیے زیر غور لایا جا رہا ہے۔ ان کے مطابق صبا قمر ایک باصلاحیت اداکارہ ہیں جو کسی بھی کردار کو مؤثر انداز میں نبھا سکتی ہیں۔انہوں نے صبا قمر کے ڈرامے "کیس نمبر 9" کو سراہتے ہوئے کہا کہ اس نے معاشرتی مسائل خصوصاً ہراسانی کے حوالے سے آگاہی پیدا کی۔اداکار کا کہنا تھا کہ اگر کسی متنازع یا منفی کہانی کو پیش کرنا ہی مقصود ہو تو اسے فلمی اسکرین پر دکھایا جانا چاہیے، کیونکہ سنیما دیکھنا ناظرین کی اپنی پسند پر منحصر ہوتا ہے، جبکہ ٹی وی ڈرامے گھروں میں ہر عمر کے افراد کی دسترس میں ہوتے ہیں۔انہوں نے کہا کہ کسی مجرم یا متنازع شخصیت کی کہانی کو عوامی سطح پر پیش کرنا ایک حساس معاملہ ہے اور اس میں ذمہ داری اور احتیاط ضروری ہے۔شمعون عباسی نے یہ بھی مؤقف اختیار کیا کہ ایسے منصوبے اکثر وائرل واقعات سے فائدہ اٹھانے کی کوشش ہوتے ہیں، تاہم انہوں نے اس حوالے سے مزید تفصیل دینے سے گریز کیا۔واضح رہے کہ اطلاعات کے مطابق ایک پروڈکشن ہاؤس کراچی کی مبینہ منشیات فروش شخصیت کی زندگی پر مبنی ڈراما سیریز تیار کر رہا ہے، جس کے سکرپٹ اور کاسٹ کے حوالے سے مختلف نام سامنے آ رہے ہیں۔ماضی میں بھی حقیقی جرائم پر مبنی مواد پاکستان میں بحث کا باعث بنتا رہا ہے اور اس کی نمائش اور پیشکش پر مختلف مواقع پر اعتراضات سامنے آتے رہے ہیں۔