آسکر یافتہ آئرش اداکارہ برینڈا فریکر 81 برس کی عمر میں انتقال کر گئیں

نیو یارک( شوبزڈیسک)آسکر ایوارڈ یافتہ آئرلینڈ کی معروف اداکارہ برینڈا فریکر 81 برس کی عمر میں انتقال کر گئیں۔برینڈا فریکر اپنی یادگار اداکاری کے باعث فلم "مائی لیفٹ فُٹ"، "ہوم الون 2: لاسٹ اِن نیو یارک" اور بی بی سی کے ڈرامے "کیجولٹی" سے عالمی شہرت حاصل کر چکی تھیں۔انہوں نے فلم "مائی لیفٹ فُٹ" میں بہترین معاون اداکارہ کی شاندار اداکاری پر 1990 میں اکیڈمی ایوارڈ (آسکر) جیتا اور آسکر حاصل کرنے والی پہلی آئرش اداکارہ بننے کا اعزاز اپنے نام کیا۔فروری 1945 میں ڈبلن میں پیدا ہونے والی برینڈا فریکر نے اپنے فنی سفر کا آغاز 1970 کی دہائی میں تھیٹر اور ٹیلی ویژن سے کیا تھا۔ان کے ایجنٹ فل بیل فیلڈ نے میڈیا سے گفتگو میں ان کے انتقال کی تصدیق کرتے ہوئے کہا کہ "ہمیں برینڈا جیسی شخصیت دوبارہ کبھی دیکھنے کو نہیں ملے گی۔"انہوں نے مزید کہا کہ "ان کی عدم موجودگی نے دنیا کو پہلے سے زیادہ تہی دامن کر دیا ہے، میرے لیے یہ اعزاز کی بات تھی کہ میں انہیں جانتا تھا اور ان کے ساتھ کام کرنے کا موقع ملا۔"