اسلام آباد( پاکستان خبر) وفاقی وزیر خزانہ و محصولات محمد اورنگزیب نے واشنگٹن ڈی سی کے دورے کے دوران امریکی ایکسپورٹ امپورٹ بینک (ایگزم بینک) کے صدر اور چیئرمین جان جوانووک سے اہم ملاقات کی، جس میں پاکستان اور امریکا کے درمیان اقتصادی و تجارتی تعلقات کو مزید مضبوط بنانے کے امور پر تفصیلی بات چیت کی گئی۔ملاقات میں طویل المدتی ترقیاتی منصوبوں کے لیے مالی معاونت کے حصول، امریکی سرمایہ کاری کے فروغ اور کپاس، سویا بین، ہائیڈروکاربن سمیت مختلف زرعی اور تجارتی شعبوں میں تعاون بڑھانے پر تبادلہ خیال کیا گیا۔وزیر خزانہ محمد اورنگزیب نے ترجیحی منصوبوں کے لیے ایگزم بینک کے مجوزہ فریم ورک، کئی سالہ مالیاتی تعاون کے نظام اور امریکی مالی معاونت، جدید ٹیکنالوجی، آلات اور خدمات تک رسائی بہتر بنانے کی تجاویز کو سراہا۔انہوں نے کہا کہ یہ پیش رفت پاکستان اور امریکا کے درمیان اقتصادی شراکت داری کو مزید مضبوط بنانے میں اہم کردار ادا کرے گی۔ملاقات کے دوران دونوں فریقوں نے قلیل المدتی مالیاتی معاملات کو آگے بڑھانے، رابطوں کو مؤثر بنانے کے لیے فوکل پرسنز مقرر کرنے اور مجوزہ اسٹریٹجک فریم ورک کو جلد مکمل کرنے پر اتفاق کیا۔
