ممبئی( شوبز ڈیسک) بھارتی سینئر اداکار پریش راول نے پہلی بار ان وجوہات سے پردہ اٹھا دیا ہے جن کی وجہ سے انہوں نے فلم ’او ایم جی 2‘ میں اداکاری کرنے سے انکار کیا تھا۔ایک حالیہ انٹرویو میں پریش راول نے بتایا کہ انہوں نے فلم کے ہدایت کار اور مصنف امیت رائے کے ساتھ مل کر جنسی تعلیم کے موضوع پر ایک الگ کہانی کا تصور تیار کیا تھا۔اداکار کے مطابق اس فلم کی بنیادی کہانی ان کے خیال پر مبنی تھی، جو ایک ایسے نوجوان کے گرد گھومتی تھی جس کی نامناسب ویڈیو سوشل میڈیا پر وائرل ہو جاتی ہے اور اس کے بعد اسے زندگی میں مشکلات کا سامنا کرنا پڑتا ہے، جبکہ اس کا والد اسے انصاف دلانے کے لیے جدوجہد کرتا ہے۔پریش راول نے بتایا کہ اس کہانی میں والد کی رہنمائی کے لیے ایک کردار کی ضرورت تھی، لیکن اسے خدا کے روپ میں پیش کرنے کی ضرورت نہیں تھی۔ ان کا کہنا تھا کہ پہلی فلم ’او ایم جی‘ میں خدا کا کردار اس لیے شامل تھا کیونکہ اس میں مقدمہ خدا کے خلاف تھا، لیکن نئی کہانی میں ایسا کوئی معاملہ نہیں تھا۔انہوں نے مزید کہا کہ فلم کو معلوماتی، دلچسپ اور معیاری بنانے کے لیے معروف ماہرِ جنسیات ڈاکٹر پرکاش کوتھاری کو بھی منصوبے میں شامل کیا گیا تھا، جس کے لیے کئی ملاقاتیں بھی کی گئیں۔پریش راول کے مطابق فلم کا مقصد ایک حساس موضوع کو تعلیمی اور مثبت انداز میں پیش کرنا تھا، تاہم بعض وجوہات کی بنا پر وہ اس منصوبے کا حصہ نہ بن سکے۔
