نیویارک ( سپورٹس ڈیسک)برازیل کے عظیم فٹبالر پیلے کی 1958 فیفا ورلڈکپ فائنل میں پہنی گئی تاریخی جرسی ریکارڈ قیمت میں فروخت ہو گئی۔عالمی میڈیا کے مطابق نیویارک میں ہونے والی نیلامی کے دوران پیلے کی یادگار جرسی 49 لاکھ ڈالر میں نیلام ہوئی، جس کے بعد یہ فٹبال کی تاریخ میں فروخت ہونے والی دوسری مہنگی ترین جرسی بن گئی ہے۔یہ جرسی 1958 کے ورلڈکپ فائنل کی یادگار ہے، جب صرف 17 سال کی عمر میں پیلے نے میزبان سویڈن کے خلاف دو گول کر کے برازیل کو پہلی مرتبہ عالمی کپ کا فاتح بنوایا تھا۔اس کامیابی کے ساتھ پیلے کے شاندار کیریئر میں تین ورلڈکپ ٹائٹلز جیتنے کے سفر کا آغاز ہوا۔ وہ آج بھی ورلڈکپ فائنل میں گول کرنے والے دنیا کے کم عمر ترین کھلاڑی کا اعزاز رکھتے ہیں۔نیلامی کے منتظمین کے مطابق اس تاریخی جرسی کے حصول کے لیے پانچ سے زائد خریداروں نے بولی لگائی۔دلچسپ امر یہ ہے کہ یہی جرسی 2004 میں صرف ایک لاکھ 5 ہزار 600 ڈالر میں فروخت ہوئی تھی، تاہم وقت گزرنے کے ساتھ اس کی تاریخی اہمیت میں اضافہ ہوا اور اس کی قیمت کئی گنا بڑھ گئی۔فٹبال کی تاریخ میں اب تک سب سے زیادہ قیمت میں فروخت ہونے والی جرسی کا اعزاز ارجنٹائن کے لیجنڈ فٹبالر ڈیاگو میراڈونا کی 1986 ورلڈکپ کی مشہور جرسی کو حاصل ہے۔
