ممبئی( شو بز ڈیسک)بالی ووڈ اور ہندی سنیما کے معروف اداکار راجیش شرما کو جنوبی بھارت کے سپر اسٹار پربھاس کی نئی فلم کی شوٹنگ کے دوران زہریلے کیڑے نے کاٹ لیا، جس کے بعد ان کی طبیعت خراب ہوگئی۔بھارتی میڈیا رپورٹس کے مطابق راجیش شرما اس وقت کلکتہ کے ڈھاکوریا میں واقع منی پال اسپتال میں زیر علاج ہیں۔اداکارہ سودیپا چٹرجی نے راجیش شرما کے اہل خانہ کی جانب سے سوشل میڈیا پر ایک بیان جاری کرتے ہوئے ان کی خراب صحت سے متعلق آگاہ کیا۔بیان کے مطابق یہ واقعہ حیدرآباد کے راموجی فلم سٹی میں پیش آیا، جہاں پربھاس کی فلم کی شوٹنگ جاری تھی۔ شوٹنگ ختم ہونے کے بعد راجیش شرما گھنی جھاڑیوں کے قریب مقامی تکنیکی عملے کے افراد سے گفتگو کر رہے تھے کہ اسی دوران انہیں ایک زہریلے کیڑے نے کاٹ لیا۔بیان میں کہا گیا کہ اداکار نے ابتدا میں اس واقعے کو معمولی سمجھا اور فوری طبی امداد حاصل نہیں کی۔ تاہم تقریباً 6 گھنٹے بعد ان کی دائیں ٹانگ میں شدید درد شروع ہوگیا۔طبیعت خراب ہونے کے باوجود وہ کلکتہ روانہ ہوگئے، لیکن دوران سفر انہیں تیز بخار ہوگیا اور ان کی حالت مزید بگڑ گئی۔اسپتال کے ڈاکٹروں کے مطابق زہریلے مادے کے باعث ہونے والا انفیکشن راجیش شرما کے پاؤں کی انگلیوں سے لے کر گھٹنے تک پھیل چکا ہے، جبکہ ٹانگ پر بڑے چھالے بھی بن گئے ہیں۔ انہیں سانس لینے میں بھی مشکلات کا سامنا ہے۔ڈاکٹروں نے خدشہ ظاہر کیا ہے کہ انفیکشن کے باعث ٹانگ میں خون کا لوتھڑا بن سکتا ہے، جو خون کے بہاؤ کے ساتھ پھیپھڑوں تک پہنچنے کی صورت میں خطرناک ثابت ہو سکتا ہے۔راجیش شرما کی حالت تاحال تشویشناک بتائی جا رہی ہے اور وہ ڈاکٹروں کی نگرانی میں زیر علاج ہیں۔
