پیرس( سپورٹس ڈیسک) چیمپئنز فٹبال لیگ میں پیرس سینٹ جرمین کی فتح کے بعد شہر میں جشن کے دوران ہنگامہ آرائی دیکھنے میں آئی، جس کے نتیجے میں پولیس اور شائقین کے درمیان شدید جھڑپیں ہوئیں۔مختلف واقعات میں تقریباً چار سو افراد کو گرفتار کیا گیا جبکہ سات پولیس اہلکار زخمی بھی ہوئے۔ ہنگامہ آرائی کے دوران بس اسٹاپ کو نقصان پہنچایا گیا اور متعدد موٹر سائیکلوں کو آگ لگا دی گئی۔اطلاعات کے مطابق کچھ مقامات پر مظاہرین نے آتش بازی کے سامان کو پولیس اہلکاروں کی جانب بھی پھینکا۔ صورتحال پر قابو پانے کے لیے شہر بھر میں ہزاروں پولیس اہلکار تعینات کیے گئے تھے، تاہم بعض علاقوں میں بدامنی کو مکمل طور پر روکا نہ جا سکا۔واضح رہے کہ پی ایس جی نے فائنل میں آرسنل کو شکست دے کر چیمپئنز لیگ کا ٹائٹل اپنے نام کیا۔ فرانسیسی وزیر داخلہ کے مطابق شہر میں سخت سیکیورٹی اقدامات کے باوجود بعض مقامات پر بدامنی کے واقعات پیش آئے، جبکہ اس سے قبل بھی ایسی کامیابیوں کے بعد پیرس میں ہنگامے دیکھے گئے ہیں۔
