حیدرآباد( سپورٹس ڈیسک) حیدرآباد کنگز مین کے کپتان مارنس لبوشین نے کہا ہے کہ ٹیم کو بیٹنگ اور بولنگ دونوں میں اچھا آغاز درکار ہے اور کھیل کے ہر شعبے میں بہتری کی گنجائش موجود ہے۔پہلی مرتبہ پاکستان سپر لیگ میں حصہ لینے والے آسٹریلوی اسٹار نے ’ایکسپریس ڈیجیٹل‘ کو دیے گئے خصوصی انٹرویو میں کہا کہ یہ ایک بہترین تجربہ رہا ہے۔ وہ مزید کہتے ہیں کہ چونکہ حیدرآباد کنگز مین ایک نئی ٹیم ہے، اس لیے تمام کھلاڑیوں کے ساتھ جان پہچان بڑھانا اور ایک ساتھ سفر جاری رکھنا بہت خوشگوار ہے۔مارنس لبوشین نے بتایا کہ ابتدائی دو میچز منصوبے کے مطابق نہیں گئے، لیکن کئی مثبت پہلو سامنے آئے ہیں۔ ان کے مطابق جیسے جیسے ایونٹ آگے بڑھے گا، ٹیم کی کارکردگی مزید بہتر ہوگی۔ کپتان نے کہا کہ اعتماد پیدا کرنا اور ایک دوسرے کے کھیل کو سمجھنا اصل چیلنج ہے۔انہوں نے مزید کہا کہ جب ٹیم خود کو مضبوط پوزیشن میں لا کر مخالف پر دباؤ ڈالے گی تو میچ جیتنے کے امکانات بڑھ جائیں گے۔ ٹیم کو محنت جاری رکھتے ہوئے درست تیاری کرنی ہوگی اور میدان میں اعتماد کے ساتھ اپنی صلاحیتوں پر بھروسہ کرتے ہوئے کھیلنا ہوگا۔
