کراچی( شوبز ڈیسک) معروف اداکارہ سویرا ندیم نے پہلی بار اپنی ازدواجی اور خاندانی زندگی کو سوشل میڈیا سے دور رکھنے کی وجہ بیان کردی۔ایک مارننگ شو میں گفتگو کرتے ہوئے سویرا ندیم نے اپنی شادی اور نجی زندگی کے حوالے سے تفصیلی بات کی۔ انہوں نے بتایا کہ وہ جان بوجھ کر خاندان کی تصاویر یا ذاتی تفصیلات سوشل میڈیا پر شیئر نہیں کرتیں کیونکہ وہ اپنی نجی زندگی کی رازداری برقرار رکھنا چاہتی ہیں۔شادی سے متعلق بات کرتے ہوئے اداکارہ نے کہا کہ یہ روایتی طرز کی طے شدہ شادی نہیں تھی بلکہ انہوں نے اپنی مرضی سے شادی کا فیصلہ کیا۔سویرا ندیم کے مطابق ان کی اپنے شوہر سے ملاقات مشترکہ دوستوں کے ذریعے ہوئی، جنہوں نے دونوں کو ایک دوسرے سے ملنے کا مشورہ دیا۔ پہلی ملاقات کے بعد دونوں میں اچھی ہم آہنگی پیدا ہوئی اور یہ تعلق بالآخر شادی میں بدل گیا۔اداکارہ نے بتایا کہ ان کے شوہر کا تعلق شوبز سے نہیں بلکہ ٹیکنالوجی کے شعبے سے ہے اور وہ سافٹ ویئر کے ماہر ہیں۔سویرا ندیم نے دلچسپ انداز میں بتایا کہ شادی سے قبل ان کے شوہر نے ان کی اداکاری نہیں دیکھی تھی۔ ان کے بقول بعد میں انہوں نے شوہر کو اپنی اداکاری دکھانے کے لیے پرانی ڈی وی ڈیز دیکھنے پر مجبور کیا۔
