ممبئی( شو بز ڈیسک)بالی ووڈ اداکارہ سوناکشی سنہا اور ان کے شوہر ظہیر اقبال نے انکشاف کیا ہے کہ ان کے درمیان تعلقات کو سب سے پہلے سلمان خان نے محسوس کر لیا تھا، حالانکہ اس وقت دونوں نے اپنے رشتے کا باضابطہ طور پر اظہار نہیں کیا تھا۔ایک حالیہ گفتگو کے دوران سوناکشی سنہا نے بتایا کہ ان کی اور ظہیر اقبال کی پہلی ملاقات سلمان خان کی ایک تقریب میں ہوئی تھی۔ ان کے مطابق سلمان خان نے ابتدا ہی میں دونوں کے درمیان بڑھتی قربت کو بھانپ لیا تھا، تاہم جب بھی وہ اس بارے میں سوال کرتے تو وہ یہی کہتے کہ ایسی کوئی بات نہیں ہے۔سوناکشی نے بتایا کہ ایک بار سلمان خان نے انہیں الگ بلا کر کہا تھا کہ ممکن ہے ایک وقت ایسا آئے جب دونوں کے درمیان اختلاف ہو، پھر وہ اور ظہیر اپنی اپنی شکایات لے کر ان کے پاس آئیں گے۔ ان کا کہنا تھا کہ چونکہ وہ دونوں سے محبت کرتے ہیں، اس لیے کسی ایک فریق کا ساتھ نہیں دے سکتے۔اداکارہ کے مطابق سلمان خان کی یہ بات سن کر وہ اور ظہیر حیران رہ گئے تھے، کیونکہ اس وقت تک انہوں نے اپنے تعلق کے بارے میں کسی کو کچھ نہیں بتایا تھا۔ظہیر اقبال نے بھی اس واقعے کی تصدیق کرتے ہوئے کہا کہ انہوں نے سلمان خان کو اپنے رشتے سے متعلق کوئی معلومات نہیں دی تھیں، لیکن وہ پہلے ہی سب کچھ سمجھ چکے تھے۔ ان کے مطابق ایک ٹریکنگ سفر کے دوران سلمان خان نے صرف اتنا کہا تھا کہ "سب نظر آ رہا ہے"، جس سے ان کا اشارہ دونوں کے تعلق کی طرف تھا۔ظہیر کا کہنا تھا کہ سلمان خان نے نہ کوئی سوال کیا اور نہ ہی اس موضوع پر مزید بات کی، لیکن ان کے انداز سے واضح تھا کہ وہ دونوں کے درمیان موجود قربت کو محسوس کر چکے تھے۔
