لاہور( شوبز ڈیسک)پاکستان کے سینئر اداکار وسیم عباس نے اپنی دوسری شادی، طلاق اور سابق اہلیہ اداکارہ صبا حمید سے تعلق کے حوالے سے اہم انکشافات کیے ہیں۔وسیم عباس کا ایک انٹرویو سوشل میڈیا پر زیرِ گردش ہے جس میں وہ صبا حمید سے اپنے ازدواجی تعلق کے خاتمے پر گفتگو کرتے نظر آ رہے ہیں۔اداکار نے بتایا کہ ان کی اور صبا حمید کی شادی 29 برس تک قائم رہی، جس کے بعد دونوں نے باہمی رضامندی سے طلاق کا فیصلہ کیا۔ انہوں نے کہا کہ میری دعائیں صبا کے ساتھ ہیں اور میں چاہتا ہوں کہ وہ خوش رہیں۔وسیم عباس کا کہنا تھا کہ ضروری نہیں کہ جب کوئی رشتہ ختم ہو تو اس میں ایک شخص سچا اور دوسرا جھوٹا ہو، بعض اوقات دونوں افراد اپنی اپنی جگہ درست ہوتے ہیں اور ان کے پاس اپنی وجوہات ہوتی ہیں۔انہوں نے کہا کہ اگر کوئی رشتہ بوجھ بن جائے تو انسان کو کرخت زندگی گزارنے کے بجائے مناسب وقت پر عزت و احترام کے ساتھ راستے جدا کر لینے چاہئیں، اس میں کوئی برائی نہیں۔اداکار نے بتایا کہ ان کے اور صبا حمید کے بچے نہیں تھے، جبکہ ان کی پہلی شادی سے چار اور صبا کی پہلی شادی سے دو بچے تھے۔ ان کے مطابق شادی کے وقت دونوں نے فیصلہ کیا تھا کہ وہ آپس میں بچے نہیں چاہیں گے۔ایک سوال کے جواب میں وسیم عباس نے کہا کہ ان کی صبا حمید سے کوئی ناراضی نہیں، آج بھی اگر کہیں ملاقات ہو تو خوشگوار ماحول میں بات چیت ہوتی ہے، جبکہ اگر کسی ڈرامے میں دونوں کو ساتھ کام کرنے کا موقع ملا تو وہ ضرور کام کریں گے۔
