ممبئی( شو بز ڈیسک)بھارتی ٹی وی انڈسٹری کی معروف اداکارہ شلپا شندے نے برسوں بعد ایک اہم انکشاف کرتے ہوئے اعتراف کیا ہے کہ ڈراما سیریل ’’بھابی جی گھر پر ہیں‘‘ کے پروڈیوسر سنجے کوہلی کے خلاف دائر کیا گیا جنسی ہراسانی کا مقدمہ حقیقت پر مبنی نہیں تھا۔شلپا شندے نے ایک پوڈکاسٹ میں گفتگو کرتے ہوئے کہا کہ اس وقت پروڈکشن ٹیم کے ساتھ ادائیگیوں اور معاہدے سے متعلق شدید اختلافات تھے اور وہ سمجھتی تھیں کہ اپنے حقوق کے لیے قانونی راستہ اختیار کرنا ضروری تھا۔اداکارہ نے پہلی بار واضح طور پر تسلیم کیا کہ ہراسانی کا الزام درست نہیں تھا، تاہم ان کے مطابق مقدمے کے بعد دونوں فریقین کے درمیان معاملات عدالت سے باہر طے پا گئے تھے اور ان کی بقایا ادائیگیاں بھی مکمل کر دی گئی تھیں۔انہوں نے کہا کہ وقت کے ساتھ حالات بدل گئے ہیں اور اب ان کے سنجے کوہلی کے ساتھ تعلقات معمول پر آ چکے ہیں، جبکہ وہ دوبارہ ان کے ساتھ کام بھی کر رہی ہیں۔واضح رہے کہ 2016 میں اس ڈرامے سے علیحدگی اور بعد ازاں ہراسانی کے مقدمے نے بھارتی ٹی وی انڈسٹری میں خاصی ہلچل پیدا کی تھی، جو ایک طویل عرصے تک میڈیا کی توجہ کا مرکز بنا رہا۔
