اسکردو میں سرفرنگا نیشنل میراتھن 2026 کا کامیاب انعقاد، ایک ہزار سے زائد ایتھلیٹس کی شرکت

اسکردو ( سپورٹس ڈیسک)اسکردو میں پاک فوج کے زیر اہتمام “معرکۂ حق دوسری سرفرنگا نیشنل میراتھن 2026” کا کامیاب انعقاد کیا گیا۔تفصیلات کے مطابق دنیا کے بلند ترین صحرا سرفرنگا میں 21 کلومیٹر طویل میراتھن کے ساتھ سینئر سٹیزنز اور طلبہ کے لیے فن رن کا بھی اہتمام کیا گیا۔اس سرفرنگا نیشنل میراتھن میں گلگت بلتستان سمیت پاکستان بھر سے ایک ہزار سے زائد ایتھلیٹس نے شرکت کی۔کمانڈر ایف سی این اے اس میراتھن کی اختتامی تقریب کے مہمانِ خصوصی تھے۔میراتھن میں پہلی پوزیشن حاصل کرنے والے ایتھلیٹ محمد اختر کو 10 لاکھ روپے نقد انعام اور میڈل سے نوازا گیا۔ دوسری پوزیشن حاصل کرنے والے سہیل عامر کو 7 لاکھ روپے جبکہ تیسری پوزیشن حاصل کرنے والے شہباز کو 4 لاکھ روپے نقد انعام دیا گیا۔پہلی 50 پوزیشنز پر آنے والے ایتھلیٹس کو بھی نقد انعامات، میڈلز اور سرٹیفکیٹس سے نوازا گیا۔تقریب کے شرکاء اور مقامی عوام نے پاک فوج کی جانب سے اس ایونٹ کے انعقاد کو بھرپور سراہا۔ ان کا کہنا تھا کہ یہ میراتھن علاقے میں امن، یکجہتی اور صحت مند سرگرمیوں کے فروغ کے لیے ایک قابلِ تحسین اقدام ہے۔شرکاء کے مطابق اس کامیاب ایونٹ نے نوجوانوں کو مثبت سرگرمیوں کی جانب راغب کرنے میں اہم کردار ادا کیا ہے۔واضح رہے کہ پاک فوج دفاعِ وطن کے ساتھ ساتھ نوجوانوں کو صحت مند اور تعمیری سرگرمیوں کی طرف راغب کرنے کے لیے بھی مسلسل اقدامات کر رہی ہے۔