لاہور ( سپورٹس ڈیسک) انڈر 18 ہاکی ایشیا کپ میں پاکستان نے شاندار آغاز کرتے ہوئے اپنے پہلے میچ میں چین کو صفر کے مقابلے میں تین گول سے شکست دے دی۔میچ کے آغاز سے ہی پاکستان ٹیم نے جارحانہ کھیل پیش کیا اور پہلے ہی کوارٹر میں برتری حاصل کر لی۔ چھٹے منٹ میں محمد عثمان نے گول اسکور کر کے ٹیم کو آغاز میں ہی سبقت دلا دی۔اس کے کچھ ہی دیر بعد عدیل نے شاندار گول کر کے پاکستان کی برتری دو صفر کر دی، جس کے بعد پہلے کوارٹر میں پاکستان مکمل طور پر حاوی رہا۔دوسرے اور تیسرے کوارٹر میں دونوں ٹیموں کی جانب سے سخت مقابلہ دیکھنے میں آیا تاہم کوئی بھی ٹیم گول کرنے میں کامیاب نہ ہو سکی۔آخری کوارٹر میں سلمان یاسین نے ایک اور گول کر کے پاکستان کی برتری کو مستحکم کیا اور یوں مقابلہ تین صفر سے پاکستان کے نام رہا۔پاکستانی ٹیم نے عمدہ ٹیم ورک اور دفاعی حکمت عملی کا مظاہرہ کرتے ہوئے میچ میں واضح برتری برقرار رکھی۔ٹورنامنٹ میں پاکستان اپنا دوسرا میچ اتوار کو ملائیشیا کے خلاف کھیلے گا۔
