سڈنی( سپورٹس ڈیسک)سڈنی میں آسٹریلوی کرکٹر ڈیوڈ وارنر کو نشے کی حالت میں گاڑی چلانے کے الزام میں حراست میں لیے جانے کے بعد نیو ساؤتھ ویلز کرکٹ حکام نے ان کی حمایت کا اعلان کیا ہے۔رپورٹس کے مطابق سابق ٹیسٹ اوپنر کو دو روز قبل پولیس نے گرفتار کیا تھا اور وہ اس کیس میں آئندہ ماہ عدالت میں پیش ہوں گے۔نیو ساؤتھ ویلز کرکٹ باڈی نے اپنے بیان میں کہا ہے کہ وہ واقعے سے مکمل طور پر آگاہ ہے اور نشے میں ڈرائیونگ جیسے عمل کو سنجیدگی سے لیتی ہے، تاہم اس مشکل وقت میں وارنر کے ساتھ کھڑی ہے۔حکام کا کہنا ہے کہ کھلاڑیوں میں محفوظ ڈرائیونگ سے متعلق آگاہی مزید بڑھانے کے لیے اقدامات کیے جائیں گے۔یاد رہے کہ ڈیوڈ وارنر اس وقت پاکستان سپر لیگ میں کراچی کنگز کی قیادت کر رہے ہیں، جہاں ٹیم اپنے ابتدائی تینوں میچز جیت چکی ہے۔وارنر نے ان میچز میں مجموعی طور پر ترانوے رنز بنائے ہیں جس میں ایک نصف سنچری بھی شامل ہے، جبکہ وہ جلد ٹیم کو دوبارہ جوائن کرنے کا امکان رکھتے ہیں۔
