واشنگٹن( سپورٹس ڈیسک)امریکا کی میجر لیگ کرکٹ (ایم ایل سی) 2026 کے ایلیمینیٹر میں واشنگٹن فریڈم نے ٹی ٹوئنٹی کرکٹ کی تاریخ کا سب سے بڑا ہدف کامیابی سے حاصل کر کے نیا ریکارڈ قائم کر دیا۔آکلینڈ میں کھیلے گئے سنسنی خیز مقابلے میں مجموعی طور پر 51 چھکے لگے، جبکہ پہلی بار کسی ٹی ٹوئنٹی میچ میں تین مختلف بلے بازوں نے سنچریاں اسکور کیں۔ایم آئی نیویارک نے پہلے بیٹنگ کرتے ہوئے مقررہ 20 اوورز میں 9 وکٹوں کے نقصان پر 266 رنز کا پہاڑ جیسا مجموعہ کھڑا کیا۔ ٹیم کی جانب سے نکولس پوران نے صرف 31 گیندوں پر برق رفتار سنچری اسکور کر کے میجر لیگ کرکٹ کی تیز ترین سنچری کا نیا ریکارڈ اپنے نام کیا۔کیرون پولارڈ نے بھی جارحانہ بیٹنگ کا مظاہرہ کرتے ہوئے 25 گیندوں پر 64 رنز بنائے اور اپنے ٹی ٹوئنٹی کیریئر میں ایک ہزار چھکوں کا تاریخی سنگ میل عبور کر لیا۔واشنگٹن فریڈم نے ریکارڈ ہدف کا کامیاب تعاقب کرتے ہوئے ٹی ٹوئنٹی کرکٹ کی تاریخ میں سب سے بڑے ہدف کو حاصل کرنے والی ٹیم کا اعزاز اپنے نام کر لیا۔
