نیویارک( ویب ڈیسک) نئی تحقیق میں انکشاف ہوا ہے کہ انٹرنیٹ پر شائع ہونے والے نئے ویب صفحات میں ایک تہائی سے زائد پر مصنوعی ذہانت کی مدد سے تحریر یا تدوین کیے جانے کے شواہد ملے ہیں۔پیُو ریسرچ سینٹر کے مطابق نئے ویب صفحات میں تقریباً 35 فیصد پر مصنوعی ذہانت کے نمایاں استعمال کے آثار پائے گئے۔ تحقیق کے لیے گزشتہ پانچ برسوں میں جمع کیے گئے تقریباً 5 لاکھ انگریزی ویب صفحات کے ریکارڈ کا جائزہ لیا گیا۔محققین نے صفحات کے متن کو ایک ایسے پروگرام کے ذریعے جانچا جو تحریر میں مصنوعی ذہانت کے ممکنہ استعمال کا اندازہ لگاتا ہے۔ مجموعی طور پر تقریباً 10 فیصد صفحات میں اے آئی سے تحریر کے واضح آثار ملے، تاہم چیٹ جی پی ٹی کے اجرا کے بعد شائع ہونے والے صفحات میں یہ شرح 35 فیصد تک پہنچ گئی۔تحقیق ایسے وقت سامنے آئی ہے جب ماہرین اور صارفین میں ان خدشات میں اضافہ ہو رہا ہے کہ خودکار نظام اور بوٹس انٹرنیٹ پر مواد کی تیاری اور استعمال میں انسانوں کی جگہ تیزی سے لے رہے ہیں۔ماہرین کے مطابق اے آئی سے تیار مواد اور بوٹس کی بڑھتی سرگرمی کے باعث مستقبل میں انسانی اور مصنوعی مواد میں فرق کرنا مزید مشکل ہوسکتا ہے۔
