کیلیفورنیا( ویب ڈیسک) مصنوعی ذہانت پر مبنی چیٹ بوٹ چیٹ جی پی ٹی میں تصاویر کی تیاری کے حوالے سے ایک نئی سہولت متعارف کرانے کا اعلان کیا گیا ہے، جس کے ذریعے صارفین تحریری ہدایات یا اپنی فراہم کردہ تصاویر کی مدد سے متحرک تصاویر (جی آئی ایف) بنا سکیں گے۔ اس مقصد کے لیے اوپن اے آئی نے نیا تصویری ماڈل ’’امیجز 2.6‘‘ متعارف کرایا ہے۔نئے ماڈل کی مدد سے کسی ساکت تصویر کو حرکت میں تبدیل کرنا ممکن ہوگا۔ صارف اپنی تصویر اپ لوڈ کرکے تحریری ہدایات کے ذریعے بتا سکے گا کہ وہ اسے کس انداز میں متحرک دیکھنا چاہتا ہے، جس کے مطابق چیٹ جی پی ٹی اسے متحرک تصویر کی شکل دے گا۔اس کے علاوہ صارفین اپنے ذہن میں موجود کسی منظر کی تفصیلات تحریری صورت میں فراہم کرکے بھی نئی متحرک تصاویر تیار کروا سکیں گے، یعنی اس سہولت کے لیے پہلے سے موجود تصویر کا ہونا ضروری نہیں ہوگا۔تیار کردہ متحرک تصاویر کی رفتار سمیت دیگر خصوصیات میں تبدیلی کی سہولت بھی دستیاب ہوگی۔ اس طرح صارفین کو متحرک تصاویر بنانے کے لیے الگ سے کسی سافٹ ویئر یا آن لائن ذریعے کی ضرورت کم پڑے گی اور وہ یہ کام براہِ راست چیٹ جی پی ٹی پر انجام دے سکیں گے۔اوپن اے آئی کے مطابق نیا تصویری ماڈل صرف متحرک تصاویر بنانے تک محدود نہیں بلکہ ساکت تصاویر بھی پہلے کے مقابلے میں زیادہ تیزی سے تیار کرسکتا ہے۔ کمپنی کا دعویٰ ہے کہ یہ سابقہ ماڈل کے مقابلے میں 50 فیصد زیادہ رفتار سے کام کرتا ہے۔کمپنی نے اس سہولت کو دنیا بھر کے صارفین کے لیے متعارف کرانے کا اعلان کیا ہے اور اس کے استعمال کے لیے ماہانہ فیس کی ادائیگی لازمی نہیں ہوگی۔
چیٹ جی پی ٹی میں تصاویر کو متحرک بنانے کی نئی سہولت متعارف کرانے کا اعلان
واپس خبروں پر
Category:
ٹیکنالوجی