پیرس ( ویب ڈیسک)فرانس کے دارالحکومت پیرس کے مضافات میں واقع ایک نفسیاتی اسپتال میں ذہنی امراض کے علاج کے لیے ایک انوکھا اور پُرسکون طریقہ اپنایا جا رہا ہے، جس میں مریضوں کو گدھوں کے ساتھ وقت گزارنے کا موقع دیا جاتا ہے۔یہ منفرد طبی منصوبہ ویل ایورارڈ اسپتال میں جاری ہے، جہاں روایتی علاج کے ساتھ ساتھ مریضوں کو ایک فطری اور ذہنی سکون فراہم کرنے والی سرگرمی میں شامل کیا جاتا ہے۔اس طریقہ علاج کے تحت مریض گدھوں کو ساتھ لے کر سیر کرتے ہیں، ان کی دیکھ بھال کرتے ہیں اور ان کے ساتھ جذباتی وابستگی قائم کرتے ہیں، جس سے ان کی ذہنی کیفیت میں بہتری محسوس کی جاتی ہے۔حالیہ سیشنز کے دوران مریضوں نے متعدد گدھوں کے ساتھ وقت گزارا اور رخصت ہوتے وقت انہیں محبت اور اپنائیت کے ساتھ گلے بھی لگایا۔اسپتال میں زیرِ علاج ایک مریضہ نے بتایا کہ گدھوں کے ساتھ وقت گزارنے سے انہیں وہی سکون ملتا ہے جو بعض اوقات دواؤں سے حاصل ہوتا ہے، اور اس عمل سے ذہنی دباؤ میں واضح کمی آتی ہے۔اس علاجی عمل میں ہر مریض کو ایک مخصوص گدھے کے ساتھ منسلک کیا جاتا ہے تاکہ وقت کے ساتھ دونوں ایک دوسرے کی عادات اور مزاج کو سمجھ سکیں اور ایک مضبوط ربط قائم ہو سکے۔اسپتال کی ایک نرس کے مطابق اس طریقہ علاج کے بعد کئی مریضوں کی حالت میں نمایاں بہتری دیکھی گئی ہے، خاص طور پر ان مریضوں میں جو ابتدا میں شدید ذہنی دباؤ اور جسمانی کمزوری کا شکار تھے۔انتظامیہ کے مطابق یہ طریقہ علاج مریضوں کو اعتماد، سکون اور ذہنی توازن فراہم کرنے میں مددگار ثابت ہو رہا ہے اور اسے ایک مؤثر معاون علاج کے طور پر استعمال کیا جا رہا ہے۔
