اسلام آباد( کامرس ڈیسک)عالمی ریٹنگ ادارے موڈیز نے پاکستان کی خودمختار کریڈٹ ریٹنگ سی اے اے ون سے بڑھا کر بی تھری کردی۔موڈیز کے مطابق ریٹنگ میں بہتری کی اہم وجوہات میں حکمرانی کے نظام میں پیش رفت، زرمبادلہ کے ذخائر میں مضبوطی اور ملکی قرض لینے کی لاگت میں کمی شامل ہیں۔ادارے نے پاکستان میں مسلسل معاشی استحکام کو بھی ریٹنگ بہتر ہونے کی بڑی وجہ قرار دیا ہے۔ موڈیز کے مطابق ان شعبوں میں بہتری سے پاکستان کی بیرونی مالی پوزیشن مزید مستحکم ہوگی جبکہ مالیاتی اشاریوں میں بھی بہتری آئے گی۔موڈیز نے تقریباً 12 ماہ کے دوران پاکستان کی ریٹنگ میں دو درجے بہتری کی ہے۔دوسری جانب وزیراعظم شہباز شریف نے پاکستان کی کریڈٹ ریٹنگ بہتر ہونے کا خیرمقدم کرتے ہوئے کہا کہ معیشت کی بہتری کے لیے نائب وزیراعظم اور فیلڈ مارشل کی کاوشیں قابلِ تحسین ہیں۔ ریٹنگ میں بہتری حکومت کی معاشی پالیسیوں اور اصلاحات پر عالمی اعتماد کا اظہار ہے۔وزیراعظم نے کہا کہ حکومت نے معیشت کو مستحکم کرنے اور بیرونی شعبے میں بہتری لانے کے لیے مؤثر اقدامات کیے ہیں۔
