ماسکو( ویب ڈیسک)ماسکو میں روس کے دو فوجی سیٹلائٹس کی خلا میں غیر معمولی اور پراسرار حرکت نے عالمی ماہرین کی توجہ حاصل کر لی ہے۔رپورٹس کے مطابق کوسموس 2581 اور کوسموس 2583 نامی یہ سیٹلائٹس، جنہیں فروری 2025 میں روس کوسموس نے خلا میں بھیجا تھا، گزشتہ ہفتے زمین سے تقریباً 585 کلومیٹر کی بلندی پر انتہائی قریب آ گئے۔ماہرین کے مطابق دونوں سیٹلائٹس کے درمیان فاصلہ صرف چند میٹر رہ گیا، جو خلا میں ایک غیر معمولی اور حساس صورتحال سمجھی جاتی ہے۔اس واقعے کی نگرانی امریکی خلائی نگرانی کمپنی کومسپوک نے کی، جس نے اسے ایک پیچیدہ اور غیر معمولی مدار ی حرکت قرار دیا ہے۔کمپنی کے مطابق سیٹلائٹس کی حرکات معمول کے مطابق سیدھی گزرنے جیسی نہیں تھیں بلکہ باریک اور کنٹرولڈ انداز میں کی گئیں، جس سے خدشہ ظاہر کیا جا رہا ہے کہ یہ کوئی تجرباتی یا جدید تکنیکی سرگرمی ہو سکتی ہے۔ماہرین کا کہنا ہے کہ اس نوعیت کی قریبی حرکات خلا میں ممکنہ ٹکراؤ کے خطرات اور سیٹلائٹ نگرانی کے نظام پر اہم سوالات پیدا کرتی ہیں۔
