کیلیفونیا( ویب ڈیسک)میٹا نے اپنے ملازمین کے کمپیوٹروں پر ایک خصوصی نگران سافٹ ویئر نصب کیا ہے، جس کا مقصد روزمرہ دفتری سرگرمیوں کا مشاہدہ اور تجزیہ کرنا ہے۔رپورٹ کے مطابق یہ نظام عام صارفین کے لیے دستیاب نہیں بلکہ صرف کمپنی کے اندرونی استعمال کے لیے تیار کیا گیا ہے۔ یہ خاموشی سے پس منظر میں کام کرتا ہے اور کمپیوٹر استعمال کرنے والے ملازمین کی مختلف سرگرمیوں کا ریکارڈ محفوظ کرتا ہے۔یہ سافٹ ویئر ماؤس کی حرکت، مختلف مقامات پر کلک، مواد کی نقل اور دفتری پروگراموں یا ویب صفحات کے استعمال جیسے امور کا مشاہدہ کرتا ہے تاکہ کمپیوٹر پر کام کرنے کے انسانی انداز کو بہتر طور پر سمجھا جا سکے۔کمپنی کا کہنا ہے کہ اس منصوبے کا مقصد ملازمین کی نگرانی کرنا نہیں بلکہ یہ جاننا ہے کہ لوگ اپنے روزمرہ کے دفتری کام کس طریقے سے انجام دیتے ہیں۔جمع کیے گئے اعداد و شمار کی مدد سے میٹا اپنے مصنوعی ذہانت کے نظاموں کو تربیت دینا چاہتا ہے تاکہ مستقبل میں ایسے خودکار معاون تیار کیے جا سکیں جو انسانوں کی طرح کمپیوٹر پر مختلف کام انجام دینے کی صلاحیت رکھتے ہوں۔ماہرین کے مطابق اس قسم کی ٹیکنالوجی مستقبل میں دفتری امور کو زیادہ خودکار اور مؤثر بنانے میں اہم کردار ادا کر سکتی ہے، تاہم اس کے ساتھ رازداری اور معلومات کے تحفظ سے متعلق سوالات بھی زیرِ بحث آ سکتے ہیں۔
