پاکستان میں ڈیجیٹل ترقی کی رفتار تیز، اسمارٹ فون استعمال 71 فیصد سے زائد

 اسلام آباد( کامرس ڈیسک) پاکستان میں ڈیجیٹلائزیشن کے شعبے میں نمایاں پیش رفت سامنے آئی ہے، جہاں اسمارٹ فون کے استعمال کی شرح بڑھ کر 71.6 فیصد تک پہنچ گئی ہے، جبکہ عام موبائل فون استعمال کرنے والے صارفین کی شرح کم ہو کر 28 فیصد رہ گئی ہے۔اقتصادی سروے کے مطابق ملک میں موبائل اور فکسڈ فون صارفین کی مجموعی تعداد 20 کروڑ 72 لاکھ سے تجاوز کر چکی ہے۔ موبائل کنکشنز کا تناسب بھی بڑھ کر 82.6 فیصد ہو گیا ہے جو گزشتہ سال کے مقابلے میں زیادہ ہے۔رپورٹ میں بتایا گیا ہے کہ براڈ بینڈ صارفین کی تعداد 16 کروڑ 10 لاکھ تک پہنچ گئی ہے، جبکہ مارچ 2026 تک 16 کروڑ سے زائد موبائل فون مقامی سطح پر تیار کیے جا چکے ہیں۔پاکستان ان ممالک میں شامل ہے جہاں انٹرنیٹ ڈیٹا نسبتاً کم قیمت پر دستیاب ہے، اور ملک میں انٹرنیٹ استعمال کا مجموعی حجم 30 ہزار سے زائد پیٹا بائٹس تک پہنچنے کا اندازہ لگایا گیا ہے۔ماہرین کے مطابق یہ اعداد و شمار پاکستان میں ڈیجیٹل معیشت، آن لائن کاروبار اور انٹرنیٹ تک رسائی میں تیزی سے ہونے والی پیش رفت کی واضح عکاسی کرتے ہیں۔