پاکستان میں مصنوعی ذہانت کی تعلیم کا فروغ، نوجوانوں کے لیے نئے روزگار کے مواقع ہو نگے: شزہ فاطمہ خواجہ

اسلام آباد( ویب ڈیسک) وفاقی وزیر برائے انفارمیشن ٹیکنالوجی شزہ فاطمہ خواجہ نے کہا ہے کہ پاکستان کے نوجوان باصلاحیت ہیں اور فری لانسنگ سمیت مختلف آن لائن پلیٹ فارمز کے ذریعے روزگار حاصل کر رہے ہیں۔اسلام آباد میں منعقدہ “اے آئی سیکھو 2026” کی تقریب سے خطاب کرتے ہوئے انہوں نے کہا کہ مصنوعی ذہانت پر مبنی تعلیم اور جدید ہنر سیکھنا وقت کی اہم ضرورت بن چکا ہے۔ان کا کہنا تھا کہ حکومت نوجوانوں کو جدید ٹیکنالوجی سے آراستہ کرنے کے لیے مختلف اقدامات کر رہی ہے تاکہ وہ عالمی سطح پر مقابلہ کر سکیں اور زیادہ سے زیادہ روزگار کے مواقع حاصل کر سکیں۔واضح رہے کہ حکومت نے گوگل فار ڈیویلپرز کے تعاون سے وزارتِ انفارمیشن ٹیکنالوجی، ٹیلی نار اور انوویٹا کے اشتراک سے “اے آئی سیکھو 2026” پروگرام شروع کیا ہے۔اس پروگرام کا مقصد نوجوانوں اور ڈویلپرز کو مصنوعی ذہانت کی مفت تربیت فراہم کرنا ہے، جبکہ اس کے تحت پہلی بار “وائب کوڈنگ” کا تصور بھی متعارف کرایا جا رہا ہے، جس میں صارف سادہ ہدایات کے ذریعے ایپلیکیشنز اور گیمز تیار کر سکیں گے۔