اسلام آباد ( ویب ڈیسک) پاکستان ٹیلی کمیونیکیشن اتھارٹی نے سمز کے غیرقانونی استعمال سے متعلق ایک نئی ایڈوائزری جاری کر دی ہے۔ترجمان کے مطابق شہریوں کو خبردار کیا گیا ہے کہ اپنی رجسٹرڈ سم کسی دوسرے شخص کو دینا قانوناً جرم ہے اور اس پر قانونی کارروائی اور سزا ہو سکتی ہے۔ اسی طرح کسی دوسرے فرد کے نام پر رجسٹرڈ سم کا استعمال بھی غیرقانونی تصور کیا جائے گا۔اتھارٹی نے واضح کیا ہے کہ کسی بھی سم کے ذریعے ہونے والی غیرقانونی سرگرمی کی ذمہ داری اس شخص پر عائد ہوگی جس کے نام پر وہ سم رجسٹرڈ ہے۔پی ٹی اے نے شہریوں کو ہدایت کی ہے کہ وہ اپنے شناختی کارڈ پر رجسٹرڈ تمام سمز کا ریکارڈ ضرور چیک کریں اور کسی بھی غیر ضروری یا نامعلوم سم کو فوری طور پر بند کروائیں۔ایڈوائزری میں مزید کہا گیا ہے کہ نئی سم صرف مجاز فرنچائز یا کسٹمر سروس سینٹر سے حاصل کی جائے تاکہ دھوکہ دہی اور غیرقانونی استعمال کے خطرات سے بچا جا سکے۔پی ٹی اے نے عوام پر زور دیا ہے کہ وہ اپنی سمز کا محفوظ اور ذمہ دارانہ استعمال یقینی بنائیں تاکہ سائبر جرائم اور دیگر غیرقانونی سرگرمیوں کی روک تھام ممکن ہو سکے۔
