پی ٹی اے کی سائبر نگرانی میں 202 ڈیجیٹل اثاثوں تک رسائی محدود، قومی ڈیجیٹل سکیورٹی مضبوط

اسلام آباد( ویب ڈیسک) پاکستان ٹیلی کمیونیکیشن اتھارٹی نے انکشاف کیا ہے کہ اپریل تا مئی 2025 کے دوران قومی ڈیجیٹل سکیورٹی کے تحفظ کے لیے متعدد اقدامات کیے گئے اور مجموعی طور پر 202 ڈیجیٹل اثاثوں تک رسائی محدود کی گئی۔جاری کردہ رپورٹ کے مطابق اس عرصے میں چوبیس گھنٹے فعال سائبر نگرانی کا نظام قائم رکھا گیا تاکہ آن لائن خطرات، غلط معلومات اور پروپیگنڈا سرگرمیوں کی بروقت روک تھام ممکن بنائی جا سکے۔اتھارٹی کے مطابق مختلف او ٹی ٹی پلیٹ فارمز سے بعض غیر ملکی مواد بھی ہٹایا گیا، جبکہ سرحد پار سے پھیلائی جانے والی گمراہ کن معلومات کے خلاف متعلقہ اداروں کے ساتھ مل کر کارروائیاں کی گئیں۔رپورٹ میں کہا گیا ہے کہ ان اقدامات کا مقصد قومی ڈیجیٹل ماحول کو محفوظ بنانا اور ملک کے خلاف چلائی جانے والی منظم پروپیگنڈا مہمات کا مؤثر تدارک کرنا تھا۔پی ٹی اے کے مطابق ان کارروائیوں کے ذریعے ڈیجیٹل سکیورٹی کو مزید مضبوط کیا گیا اور سائبر اسپیس میں نگرانی کے نظام کو بہتر بنایا گیا ہے۔