نئی دہلی( سپورٹس ڈیسک)بھارتی کرکٹ لیگ کی ٹیم پنجاب کنگز کے آل راؤنڈر ششانک سنگھ اور ان کے والد قانونی مشکلات کا سامنا کر رہے ہیں۔ بھارتی میڈیا رپورٹس کے مطابق بھوپال میں ششانک سنگھ، ان کے ریٹائرڈ پولیس افسر والد شیلیش سنگھ اور ایک ڈرائیور کے خلاف گھریلو ملازم پر مبینہ تشدد اور بدزبانی کے الزام میں مقدمہ درج کر لیا گیا ہے۔پولیس کے مطابق مقدمہ راتی باد پولیس اسٹیشن میں درج کیا گیا ہے، جس میں نازیبا زبان استعمال کرنے، معمولی جسمانی نقصان پہنچانے اور مشترکہ ارادے سے جرم کرنے کی دفعات شامل کی گئی ہیں۔شکایت کنندہ ویپیندر سنگھ تومر کا کہنا ہے کہ انہیں 25 جون کو سنگھ خاندان نے 15 ہزار روپے ماہانہ تنخواہ پر باورچی کے طور پر ملازم رکھا تھا۔ ان کے مطابق ملازمت کے پہلے ہی دن سے ان کے ساتھ سخت رویہ اختیار کیا گیا اور ان کا موبائل فون بھی اپنے پاس رکھ لیا گیا۔شکایت کنندہ نے الزام عائد کیا کہ 28 جون کو فون واپس مانگنے پر شیلیش سنگھ نے انکار کر دیا، جس کے بعد ششانک سنگھ، ان کے والد اور ڈرائیور نے انہیں تشدد کا نشانہ بنایا، گالیاں دیں اور گھر سے نکال دیا۔ انہوں نے مزید دعویٰ کیا کہ رہائش اور کھانے کے اخراجات کے نام پر ان سے ایک ہزار روپے بھی زبردستی منتقل کروائے گئے۔
