سندھ بجٹ 2026-27 کی تیاری مکمل، آئندہ ہفتے اسمبلی میں پیش کیے جانے کا امکان

کراچی( کامرس ڈیسک) سندھ حکومت مالی سال 2026-27 کے لیے آمدن و اخراجات کا بجٹ آئندہ ہفتے سندھ اسمبلی میں پیش کرنے پر غور کر رہی ہے۔ذرائع کے مطابق بجٹ پیش کرنے کے لیے سولہ اور سترہ جون کی تاریخیں زیر غور ہیں۔ حکومت کا کہنا ہے کہ عالمی مالیاتی ادارے کی شرائط اور قومی مالیاتی معاہدے پر عمل درآمد کے باعث بجٹ کی تیاری میں کچھ تاخیر ہوئی، تاہم کوشش کی جا رہی ہے کہ عاشورہ محرم سے قبل بجٹ کی منظوری مکمل کر لی جائے۔قواعد و ضوابط کے مطابق سندھ اسمبلی میں بجٹ پر کم از کم پانچ روز بحث لازمی ہوتی ہے، جس کے بعد اس کی منظوری دی جاتی ہے۔ذرائع کے مطابق وزیراعلیٰ سندھ مراد علی شاہ اب تک دس مرتبہ بجٹ پیش کر چکے ہیں اور رواں سال بھی وہی بجٹ پیش کریں گے۔ اس کے علاوہ رواں مالی سال کے مقابلے میں ترقیاتی بجٹ میں چوبیس فیصد تک کمی کا امکان ظاہر کیا جا رہا ہے۔