واشنگٹن (شوبز ڈیسک) معروف امریکی ریپر اور گلوکار میکلمور نے انکشاف کیا ہے کہ فلسطینی عوام کی حمایت میں فلاحی تقریبات منعقد کرنے کے لیے امریکا کے متعدد بڑے کنسرٹ ہالز اور اسٹیڈیمز نے انہیں جگہ فراہم کرنے سے انکار کر دیا ہے۔میکلمور نے سماجی رابطے کی ویب سائٹ انسٹاگرام پر جاری اپنے بیان میں بتایا کہ ڈبلن، پیرس اور لندن میں ان کے ’’فری فلسطین‘‘ کے عنوان سے منعقدہ فلاحی کنسرٹس کامیابی سے مکمل ہوئے، تاہم امریکا میں ایسے پروگراموں کے انعقاد میں انہیں مشکلات کا سامنا ہے۔گلوکار کے مطابق نیویارک کے معروف میڈیسن اسکوائر گارڈن، بارکلیز سینٹر اور دیگر بڑے مقامات کی انتظامیہ نے ابتدا میں انہیں دستیاب تاریخوں سے آگاہ کیا، لیکن جب انہیں معلوم ہوا کہ یہ تقریبات فلسطینی عوام کی مدد کے لیے منعقد کی جا رہی ہیں تو جگہ فراہم کرنے سے انکار کر دیا گیا۔میکلمور نے اس اقدام کو آزادیٔ اظہار کے منافی قرار دیتے ہوئے واضح کیا کہ وہ فلسطینی عوام کی حمایت سے کسی صورت دستبردار نہیں ہوں گے۔انہوں نے دوٹوک مؤقف اختیار کرتے ہوئے کہا کہ طاقتور اور بااثر افراد کنسرٹ ہالز کے مالک تو ہو سکتے ہیں، لیکن وہاں آنے والے عوام کی سوچ اور آواز پر ان کا اختیار نہیں۔گلوکار نے مزید کہا کہ اگر انہیں کنسرٹس کے لیے جگہ نہ ملی تو وہ اپنے اسٹیج خود قائم کریں گے اور فلسطینی عوام کے لیے عطیات جمع کرنے کا سلسلہ جاری رکھیں گے۔