لندن( ویب ڈیسک) میکسیکو میں امریکی سرحد کے قریب آسمان پر پرواز کرتی ایک پراسرار اور نامعلوم مخلوق کی ویڈیوز نے سوشل میڈیا پر ایک نئی بحث چھیڑ دی ہے۔سوشل میڈیا پر وائرل ہونے والی ان ویڈیوز کو دیکھ کر بعض صارفین اس مخلوق کو لاکھوں سال قبل معدوم ہو جانے والے ڈائنوسار دور کے اڑنے والے جانوروں سے مشابہ قرار دے رہے ہیں، جبکہ متعدد صارفین کا ماننا ہے کہ یہ مناظر حقیقی نہیں بلکہ مصنوعی ذہانت (اے آئی) کی مدد سے تیار کیے گئے ہیں۔برطانوی اخبار ’دی سن‘ کی رپورٹ کے مطابق یہ مناظر میکسیکو کے سرحدی شہر سیوداد خواریز کے قریب ریکارڈ کیے گئے ہیں۔ منظر عام پر آنے والی ایک ویڈیو میں رات کے وقت سی سی ٹی وی کیمرے کی فوٹیج کے دوران سیاہ رنگ کی ایک مخلوق کو فضا میں محوِ پرواز دیکھا جا سکتا ہے، جس کے بڑے پر اور سر کے پچھلے حصے میں ابھری ہوئی ساخت واضح طور پر دکھائی دیتی ہے۔اس حوالے سے سامنے آنے والی ایک دوسری ویڈیو دن کی روشنی میں بنائی گئی ہے، جس میں اسی مشابہت کی حامل مخلوق کو شہر کی عمارتوں کے اوپر سے گزرتے ہوئے دیکھا جا سکتا ہے، جس نے شہریوں اور انٹرنیٹ صارفین کو حیرت میں مبتلا کر رکھا ہے۔