یورپی یونین نے فیس بک اور انسٹاگرام کے فیچرز پر میٹا سے وضاحت طلب کر لی

برسلز( ویب ڈیسک) یورپی یونین نے سوشل میڈیا کمپنی میٹا سے فیس بک اور انسٹاگرام کے بعض ایسے فیچرز پر وضاحت طلب کی ہے جن کے بارے میں خدشہ ظاہر کیا جا رہا ہے کہ وہ صارفین، خصوصاً بچوں اور نوجوانوں، کو طویل وقت تک اسکرین پر مصروف رکھتے ہیں۔غیر ملکی میڈیا کے مطابق یورپی کمیشن نے میٹا سے مطالبہ کیا ہے کہ وہ لامحدود اسکرولنگ، خودکار طور پر چلنے والی ویڈیوز اور ضرورت سے زیادہ ذاتی نوعیت کی مواد کی سفارشات جیسے فیچرز میں تبدیلی کرے، کیونکہ یورپی یونین کے مطابق یہ عناصر بچوں کی ذہنی صحت پر منفی اثرات مرتب کر سکتے ہیں۔رپورٹس کے مطابق اگر میٹا یورپی قوانین کی خلاف ورزی کا مرتکب پائی گئی تو کمپنی کو اپنی عالمی سالانہ آمدنی کے 6 فیصد تک جرمانہ ادا کرنا پڑ سکتا ہے۔دوسری جانب میٹا نے ان الزامات سے اختلاف کرتے ہوئے مؤقف اختیار کیا ہے کہ نوجوان صارفین کے تحفظ کے لیے کمپنی نے متعدد اقدامات کیے ہیں، تاہم یورپی یونین کی رپورٹ میں ان کوششوں کو مناسب اہمیت نہیں دی گئی۔