لاہور( سپورٹس ڈیسک) نیشنل کرکٹ اکیڈمی میں تیز گیند بازوں کی صلاحیتیں نکھارنے کے لیے منعقدہ تربیتی کیمپ کا پہلا مرحلہ مکمل ہوگیا۔24 سے 28 اگست تک جاری رہنے والے کیمپ میں فاسٹ بولرز نے کوچنگ عملے کی نگرانی میں اپنی گیند بازی کی تکنیک بہتر بنانے اور خامیوں پر قابو پانے کی مشق کی۔ قومی سفید گیند ٹیم کے معاون کوچ ایشلے نوفکے نے کھلاڑیوں کی تکنیکی کمزوریوں اور بہتری کے ممکنہ پہلوؤں پر خصوصی توجہ دی۔کیمپ کے آخری روز قومی سفید گیند ٹیم کے ہیڈ کوچ مائیک ہیسن نے بھی شرکت کی اور نیٹ سیشن کے دوران ابھرتے ہوئے فاسٹ بولرز کی کارکردگی کا جائزہ لیتے ہوئے انہیں مفید تکنیکی ہدایات دیں۔ڈائریکٹر ہائی پرفارمنس عاقب جاوید نے بھی اختتامی روز کھلاڑیوں سے ملاقات کی۔ پشاور ریجن کے ابوذر کو کیمپ کا بہترین بولر جبکہ رضا اللہ کو بولر آف دی کیمپ قرار دیا گیا۔کیمپ کا دوسرا مرحلہ اسپن بولرز کے لیے 31 اگست سے 4 ستمبر تک نیشنل کرکٹ اکیڈمی میں منعقد ہوگا۔
