کیلیفورنیا( ویب ڈیسک)گوگل نے اپنی مفت کلاؤڈ اسٹوریج پالیسی میں اہم تبدیلی کا اعلان کرتے ہوئے کہا ہے کہ اب اینڈرائیڈ فونز کا بیک اپ ڈیٹا بھی صارفین کے مفت گوگل اکاؤنٹ اسٹوریج کا حصہ شمار ہوگا، جس سے دنیا بھر کے لاکھوں اینڈرائیڈ صارفین متاثر ہو سکتے ہیں۔کمپنی کے مطابق اب تک گوگل اکاؤنٹ کی مفت اسٹوریج میں گوگل فوٹوز کی تصاویر اور ویڈیوز، گوگل ڈرائیو میں محفوظ فائلیں اور جی میل کی ای میلز شامل ہوتی تھیں، تاہم نئی پالیسی کے نفاذ کے بعد اینڈرائیڈ ڈیوائسز کا بیک اپ بھی اسی اسٹوریج میں شامل کیا جائے گا۔گوگل نے صارفین کو ای میل کے ذریعے اس تبدیلی سے آگاہ کرتے ہوئے 45 روز کا پیشگی نوٹس دیا ہے تاکہ وہ اپنی دستیاب اسٹوریج کا جائزہ لے سکیں اور نئی پالیسی نافذ ہونے سے قبل ضروری اقدامات کر لیں۔نئی پالیسی کے تحت اینڈرائیڈ فون کی سسٹم سیٹنگز، ایپس کا ڈیٹا، ایس ایم ایس، کال ہسٹری اور دیگر بیک اپ معلومات بھی مفت کلاؤڈ اسٹوریج استعمال کریں گی، جس سے دستیاب جگہ تیزی سے بھر سکتی ہے۔گوگل کا کہنا ہے کہ صارفین غیر ضروری بیک اپ حذف کر سکتے ہیں، بیک اپ سیٹنگز میں تبدیلی کر سکتے ہیں یا ضرورت پڑنے پر اضافی کلاؤڈ اسٹوریج خریدنے کا انتخاب بھی کر سکتے ہیں۔کمپنی نے واضح کیا ہے کہ اگر کسی صارف کا بیک اپ مفت اسٹوریج کی مقررہ حد سے تجاوز کر گیا تو اسے غیر ضروری ڈیٹا حذف کرنا ہوگا یا پھر گوگل ون کے بامعاوضہ اسٹوریج پلان سے استفادہ کرنا پڑے گا۔گوگل کے ترجمان کے مطابق ایک عام اینڈرائیڈ صارف کے بیک اپ کے لیے اوسطاً 40 میگا بائٹ اضافی اسٹوریج درکار ہوگی۔ صارفین کو یہ اختیار بھی حاصل ہوگا کہ وہ اپنی مرضی سے منتخب کریں کہ کن ایپس اور کس نوعیت کے ڈیٹا کا بیک اپ محفوظ رکھا جائے۔
