لاہور( سپورٹس ڈیسک)پاکستان کی خواتین فٹبال ٹیم نے عالمی سیریز کے آغاز میں شاندار کھیل کا مظاہرہ کرتے ہوئے ترکس اینڈ کیکوس جزائر کی ٹیم کو صفر کے مقابلے میں آٹھ گول سے شکست دے کر نئی تاریخ رقم کر دی۔ یہ فتح قومی خواتین ٹیم کی اب تک کی سب سے بڑی کامیابی قرار دی جا رہی ہے، جس نے دو ہزار بائیس میں مالدیپ کے خلاف حاصل کی گئی صفر سات کی جیت کو بھی پیچھے چھوڑ دیا۔میچ کے پہلے حصے میں چار مختلف کھلاڑیوں نے گول کر کے ٹیم کو مضبوط برتری دلائی۔ زحمینہ ملک نے پہلا گول کیا جبکہ اقصیٰ مشتاق، لیلا بنارس اور مریم محمود نے بھی گیند کو جال کی راہ دکھائی۔دوسرے حصے میں نادیہ خان نے ہیڈر کے ذریعے پانچواں گول اسکور کیا، اقصیٰ مشتاق نے ایک اور گول کر کے برتری کو مزید مستحکم بنایا۔ لیلا بنارس نے اپنا دوسرا گول بھی اسی حصے میں کیا جبکہ میچ کے اکیاسیویں منٹ میں اسرا خان نے آخری گول کر کے اس کامیابی کو یادگار بنا دیا۔اس شاندار فتح پر پاکستان فٹبال فیڈریشن کے صدر محسن گیلانی نے ٹیم اور کوچنگ عملے کو مبارکباد دیتے ہوئے کہا کہ یہ ملک میں خواتین فٹبال کے ایک نئے دور کا آغاز ہے اور امید ظاہر کی کہ ٹیم آئندہ بھی اسی جذبے کے ساتھ کامیابیاں سمیٹے گی۔
