کراچی( شوبز ڈیسک)پاکستان کی معروف اداکارہ ماہرہ خان نے کوئٹہ کے اسپتال میں لیڈی ڈاکٹر پر تیزاب پھینکے جانے کے واقعے پر شدید غم و غصے کا اظہار کیا ہے۔سماجی رابطے کی ویب گاہ پر اپنی انسٹاگرام اسٹوری میں اداکارہ نے کہا کہ ایک خاتون انسانوں کی زندگیاں بچانے کے لیے اسپتال میں موجود تھی، لیکن اسی مقام پر اس پر تیزاب پھینک کر وحشیانہ حملہ کیا گیا، جو ایک انتہائی افسوسناک اور ناقابلِ قبول عمل ہے۔ماہرہ خان نے کہا کہ وہ اس واقعے کو سوچ کر بھی کانپ جاتی ہیں اور یہ عمل سراسر ظلم اور برائی کی علامت ہے۔ ان کے مطابق متاثرہ ڈاکٹر ماہ نور ناصر کو اس حملے میں شدید نقصان پہنچا ہے اور وہ مکمل تحفظ کی حق دار ہیں۔اداکارہ نے مزید کہا کہ یہ صرف خواتین کا نہیں بلکہ پورے معاشرے کا مسئلہ ہے، اور اس پر مردوں کو بھی آواز اٹھانی چاہیے اور ایسے واقعات کی کھل کر مذمت کرنی چاہیے۔یاد رہے کہ کوئٹہ کے ایک اسپتال میں پیش آنے والے اس واقعے کے بعد متاثرہ ڈاکٹر کو ابتدائی طبی امداد دی گئی، بعد ازاں انہیں بہتر علاج کے لیے نجی اسپتال اور پھر ایئر ایمبولینس کے ذریعے کراچی منتقل کیا گیا۔
