لندن( ویب ڈیسک)برطانیہ کے مسابقتی نگران ادارے کمپیٹیشن اینڈ مارکیٹس اتھارٹی (سی ایم اے) نے ایپل اور گوگل کے ایپ ادائیگی سے متعلق قواعد میں تبدیلیوں کی تجویز پیش کر دی ہے، جس کا مقصد ایپ ڈویلپرز کے اخراجات کم کرنا اور صارفین کو کم قیمتوں کی سہولت فراہم کرنا ہے۔مجوزہ تبدیلیوں کے تحت ایپل اور گوگل کو پابند کیا جا سکتا ہے کہ وہ ایپ ڈویلپرز کو صارفین کو متبادل ادائیگی کے طریقوں کی طرف رہنمائی کرنے کی اجازت دیں۔اس وقت برطانیہ میں ایپل متبادل ادائیگی کے طریقوں کی اجازت نہیں دیتا جبکہ گوگل نے بھی اس حوالے سے مختلف پابندیاں عائد کر رکھی ہیں، جس کے باعث ڈویلپرز کو کمپنیوں کی مقرر کردہ فیس ادا کرنا پڑتی ہے۔سی ایم اے کا کہنا ہے کہ اگر نئی تجاویز نافذ ہوئیں تو ایپل اور گوگل کی جانب سے وصول کی جانے والی فیس مناسب اور شفاف ہونی چاہیے۔ ادارے کے مطابق فیس میں کمی سے حاصل ہونے والا فائدہ صارفین کو کم قیمتوں کی صورت میں ملنا چاہیے یا ڈویلپرز اسے ایپس میں بہتری اور نئی سہولیات متعارف کرانے پر خرچ کریں۔یہ اقدام سی ایم اے کی جانب سے گزشتہ سال اکتوبر میں ایپل اور گوگل کو موبائل مارکیٹ میں خصوصی اسٹریٹجک حیثیت دیے جانے کے بعد سامنے آیا ہے، جس کے تحت ریگولیٹر کو بڑی ٹیک کمپنیوں کے کاروباری طریقہ کار میں زیادہ مسابقت یقینی بنانے کے لیے مداخلت کا اختیار حاصل ہے۔
