لاہور( شو بز ڈیسک)پاکستانی گلوکار عاصم اظہر کے نئے ریلیز ہونے والے گانے ’’آرزو‘‘ نے ریلیز ہوتے ہی سوشل میڈیا پر بھرپور مقبولیت حاصل کر لی ہے۔یہ گانا مختلف پلیٹ فارمز پر تیزی سے وائرل ہو رہا ہے اور سامعین کی جانب سے اسے خوب پذیرائی مل رہی ہے، تاہم اس کی مقبولیت کے ساتھ ایک نئی بحث بھی شروع ہو گئی ہے۔کئی صارفین کا دعویٰ ہے کہ گانے کے ایک حصے میں سنائی دینے والی آواز اداکارہ ہانیہ عامر کی ہو سکتی ہے، جس نے مداحوں میں تجسس پیدا کر دیا ہے۔یہ قیاس آرائیاں اس وقت شروع ہوئیں جب گلوکار نے اپنے سوشل میڈیا اکاؤنٹ پر گانے کی ایک جھلک شیئر کی، جس میں ایک مخصوص جملہ ’’پھر سے بولو‘‘ شامل تھا۔اس جملے نے صارفین کی توجہ حاصل کی اور مختلف آرا سامنے آنے لگیں کہ آیا یہ آواز واقعی ہانیہ عامر کی ہے یا نہیں۔سوشل میڈیا پر اس حوالے سے بحث جاری ہے اور مداح اپنی اپنی رائے کا اظہار کر رہے ہیں، جبکہ کچھ صارفین نے براہ راست اداکارہ کو بھی ٹیگ کر کے وضاحت طلب کی ہے۔تاہم اب تک نہ تو گلوکار اور نہ ہی اداکارہ کی جانب سے اس معاملے پر کوئی سرکاری وضاحت سامنے آئی ہے، جس کے باعث یہ بحث مزید بڑھتی جا رہی ہے۔
