لاہور( سپورٹس ڈیسک) کامن ویلتھ گیمز میں پاکستان کی نمائندگی کرنے والی اولمپئین ایتھلیٹ فائقہ ریاض پنجاب اسٹیڈیم لاہور میں اپنی مدد آپ کے تحت ٹریننگ کر رہی ہیں۔ٹریننگ سیشن کے دوران گفتگو کرتے ہوئے فائقہ ریاض نے کہا کہ کامن ویلتھ گیمز کے انعقاد کا اعلان کافی عرصے سے موجود تھا اور کھلاڑیوں کو بھی معلوم تھا کہ کون کون پاکستان کی نمائندگی کرے گا، لیکن ایونٹ میں چند دن باقی رہ جانے کے باوجود ایتھلیٹس کے لیے تربیتی کیمپ کا انعقاد نہیں کیا گیا۔انہوں نے کہا کہ کھلاڑی اپنی مدد آپ کے تحت تیاری کر رہے ہیں اور انہیں کوئی باقاعدہ کیمپ یا خصوصی سہولت فراہم نہیں کی گئی۔فائقہ ریاض کا کہنا تھا کہ شدید گرمی میں روزانہ گھر سے دور ٹریننگ کے لیے آنا مشکلات پیدا کرتا ہے، جس سے تیاری بھی متاثر ہوتی ہے۔ ان کے مطابق دوسری جانب بھارت کی ٹیم کافی عرصے سے یورپ میں تربیت حاصل کر رہی ہے اور اسے بین الاقوامی مقابلوں میں شرکت کے مواقع بھی مل رہے ہیں۔انہوں نے کہا کہ اگر کھلاڑیوں کو مناسب کیمپ اور بین الاقوامی معیار کی تیاری کے مواقع نہ ملیں تو عالمی سطح پر بہتر کارکردگی دکھانا مشکل ہو جاتا ہے۔اولمپئین ایتھلیٹ نے بتایا کہ کامن ویلتھ گیمز کے لیے ان کی تیاری نیشنل گیمز سے جاری ہے۔ نیشنل گیمز کے بعد جن ایونٹس میں انہوں نے شرکت کی، وہ سب ان کی تیاری کا حصہ تھے۔فائقہ ریاض نے کہا کہ ایشین بیچ گیمز میں انفرادی کارکردگی اچھی رہی اور اب کامن ویلتھ گیمز میں 100 میٹر دوڑ میں اپنی بہترین کارکردگی دکھانے کی کوشش کریں گی۔ ان کا کہنا تھا کہ ایشین گیمز کامن ویلتھ گیمز سے بھی بڑا ایونٹ ہے اور امید ہے کہ وہ اس میں بھی پاکستان کی نمائندگی کریں گی۔
