شنگھائی( ویب ڈیسک)ورلڈ آرٹیفیشل انٹیلی جنس کوآپریشن آرگنائزیشن (ڈبلیو اے آئی سی او) کے قیام کے معاہدے پر شنگھائی میں منعقدہ تقریب کے دوران پاکستان نے بانی رکن کی حیثیت سے معاہدے پر دستخط کر دیے۔ترجمان دفتر خارجہ کے مطابق پاکستان کی نمائندگی نائب وزیراعظم اور وزیر خارجہ اسحاق ڈار نے کی، جنہوں نے تنظیم کے قیام سے متعلق معاہدے پر دستخط کیے۔دفتر خارجہ کے بیان میں کہا گیا ہے کہ پاکستان نے مصنوعی ذہانت کے شعبے میں عالمی تعاون کے فروغ کے عزم کا اعادہ کرتے ہوئے اس بات پر زور دیا کہ جدید ٹیکنالوجی کے فوائد تمام ممالک تک مساوی بنیادوں پر پہنچنے چاہییں۔بیان کے مطابق پاکستان تنظیم کے دیگر رکن ممالک کے ساتھ مل کر مصنوعی ذہانت کے شعبے میں موجود عالمی تفاوت کو کم کرنے اور جدید ٹیکنالوجی تک منصفانہ اور مساوی رسائی کو فروغ دینے کے لیے تعاون جاری رکھے گا۔ترجمان دفتر خارجہ کا کہنا ہے کہ پاکستان کے نزدیک مصنوعی ذہانت کے میدان میں بین الاقوامی شراکت داری، مشترکہ ترقی اور جدید ٹیکنالوجی تک مساوی رسائی مستقبل میں پائیدار ترقی اور عالمی تعاون کے فروغ کے لیے انتہائی اہم ہے۔
