لاہور ( سپورٹس ڈیسک) پاکستان اور بھارت کی ہاکی ٹیمیں رواں ماہ لندن میں ایک دوسرے کے مدمقابل ہوں گی۔تفصیلات کے مطابق دونوں روایتی حریفوں کے درمیان میچز 23 اور 26 جون کو کھیلے جائیں گے، جن کے لیے ٹکٹوں کی فروخت بھی جاری ہے۔پاکستانی ہاکی ٹیم اس وقت لاہور میں کیمپ میں مصروف ہے اور آئندہ میچز کی تیاری کر رہی ہے۔ پرو ہاکی لیگ کے شیڈول کے مطابق قومی ٹیم 9 جون کو بیلجیم روانہ ہوگی۔اس دورے کے دوران پاکستان 13 جون کو بیلجیم اور 14 جون کو اسپین کے خلاف میدان میں اترے گا، جبکہ 19 اور 20 جون کو انہی ٹیموں کے خلاف مزید میچز شیڈول ہیں۔بعد ازاں قومی ٹیم 21 جون کو بیلجیم سے لندن پہنچے گی جہاں اگلے مرحلے کے میچز کھیلے جائیں گے۔ پاکستان 23 جون کو بھارت کے خلاف جبکہ 24 جون کو انگلینڈ کے خلاف کھیلے گا۔ 26 جون کو پاکستان اور بھارت دوبارہ آمنے سامنے ہوں گے، جبکہ 27 جون کو پاکستان کا آخری میچ انگلینڈ کے خلاف ہوگا۔اب تک لیگ میں پاکستان کی کارکردگی مایوس کن رہی ہے اور ٹیم اپنے تمام میچز میں شکست سے دوچار رہی ہے۔ پوائنٹس ٹیبل پر پاکستان کی ٹیم سب سے نیچے موجود ہے۔پرو ہاکی لیگ میں ٹیم کی پوزیشن برقرار رکھنا پاکستان کے لیے بڑا چیلنج قرار دیا جا رہا ہے، کیونکہ ہر سیزن کے آخر میں سب سے نچلی ٹیم کو لیگ سے خارج کر دیا جاتا ہے۔
